Category: Ljóð

Á víðum akri

á völlum heims

vindurinn bylgjar grasið

á þeim velli, lítið strá

dansaði þar með öðrum.

 

Með titrandi hendi

ég gríp það strá

sem fyrir sigði fellur,

stráið er ég

með sigðina í hinni hendi.

 

SS ©1975

Heimska og fáviska

eru stjúpur

þær byggja múra

og byrgja sýn

eflast saman

og afla vina.

 

Viska og þekking

eru systur

þær brjóta múra

og opna sýn

ganga saman

liðsfáar.

 

Vaknar þekking

og viskan há

er hugur og vit

fella saman

hönd og verk.

 
SS ©1997

Fortíð,

örlaganna veg vefur

í mál, hug, hönd,

gönguna hefur.

 

Nútíð,

reirð gömlum böndum,

bindst á ný,

nýjum löndum.

 

Framtíð,

gyrt viljans mætti,

bregður sverði á

slitna þætti.

 

SS © 1993